बदलापूर पूर्व आणि पश्चिम विभागात दोन संकल्प दवाखाने फाऊंडेशनच्या वतीने सुरू असून तिथे फक्त ३० रूपयांमध्ये रुग्णांची तपासणी आणि औषधे दिली जातात. गेली २१ वर्षे संस्थेच्या वतीने नियमितपणे रक्तदान शिबिरे घेतली जातात. या चळवळीच्या माध्यमातून आतापर्यंत बदलापूरमधील दहा हजारांहून अधिक रक्तदात्यांनी ऐच्छिक रक्तदान केले आहे. या आरोग्य सुविधांव्यतिरिक्त शहरातील सार्वजनिक आणि सांस्कृतिक कार्यक्रमांसाठी काका गोळे फाऊंडेशनने खुला रंगमंच उपलब्ध करून दिला आहे. सर्व प्रकारचे सरकारी दाखले देणारे ई सेवा केंद्र संकल्प सेवामार्फत चालवले जाते. कोंडेश्वर, भोज परिसरात फाऊंडेशनच्या माध्यमातून दोन हजारांहून अधिक वृक्षांची लागवड आणि संवर्धन करण्यात आले आहे. शिरगांव येथील श्री समर्थ विद्यालयाची संपूर्ण जबाबदारी काका गोळे फाऊंडेशनने घेतली आहे. संकल्प स्टडी सेंटर आणि अभ्यासिकेचा दरवर्षी शेकडो विद्यार्थी लाभ घेतात. एकूणच बदलापूरकरांना अभिमान वाटावा आणि इतर शहरांनी अनुकरण करावे, अशी आरोग्य, शैक्षणिक, पर्यावरण आणि सांस्कृतिक चळवळ फाऊंडेशनच्या वतीने अव्याहतपणे सुरू आहे.